ऋग्वेदः मण्डलं ४. Rigveda, Mandala - 4, Sukta - 41 to 45.

ऋग्वेदः वैदिकस्वरविरहितः मण्डलं ४. Rigveda, Mandala - 4, Sukta - 41.

        इन्द्रा को वां वरुणा सुम्नमाप स्तोमो हविष्माँ अमृतो न होता।
        यो वां हृदि क्रतुमाँ अस्मदुक्तः पस्पर्शदिन्द्रावरुणा नमस्वान्॥ ४.०४१.०१

        इन्द्रा ह यो वरुणा चक्र आपी देवौ मर्तः सख्याय प्रयस्वान्।
        स हन्ति वृत्रा समिथेषु शत्रूनवोभिर्वा महद्भिः स प्र शृण्वे॥ ४.०४१.०२

        इन्द्रा ह रत्नं वरुणा धेष्ठेत्था नृभ्यः शशमानेभ्यस्ता।
        यदी सखाया सख्याय सोमैः सुतेभिः सुप्रयसा मादयैते॥ ४.०४१.०३

        इन्द्रा युवं वरुणा दिद्युमस्मिन्नोजिष्ठमुग्रा नि वधिष्टं वज्रम्।
        यो नो दुरेवो वृकतिर्दभीतिस्तस्मिन्मिमाथामभिभूत्योजः॥ ४.०४१.०४

        इन्द्रा युवं वरुणा भूतमस्या धियः प्रेतारा वृषभेव धेनोः।
        सा नो दुहीयद्यवसेव गत्वी सहस्रधारा पयसा मही गौः॥ ४.०४१.०५

        तोके हिते तनय उर्वरासु सूरो दृशीके वृषणश्च पौंस्ये।
        इन्द्रा नो अत्र वरुणा स्यातामवोभिर्दस्मा परितक्म्यायाम्॥ ४.०४१.०६

        युवामिद्ध्यवसे पूर्व्याय परि प्रभूती गविषः स्वापी।
        वृणीमहे सख्याय प्रियाय शूरा मंहिष्ठा पितरेव शम्भू॥ ४.०४१.०७

        ता वां धियोऽवसे वाजयन्तीराजिं न जग्मुर्युवयूः सुदानू।
        श्रिये न गाव उप सोममस्थुरिन्द्रं गिरो वरुणं मे मनीषाः॥ ४.०४१.०८

        इमा इन्द्रं वरुणं मे मनीषा अग्मन्नुप द्रविणमिच्छमानाः।
        उपेमस्थुर्जोष्टार इव वस्वो रघ्वीरिव श्रवसो भिक्षमाणाः॥ ४.०४१.०९

        अश्व्यस्य त्मना रथ्यस्य पुष्टेर्नित्यस्य रायः पतयः स्याम।
        ता चक्राणा ऊतिभिर्नव्यसीभिरस्मत्रा रायो नियुतः सचन्ताम्॥ ४.०४१.१०

        आ नो बृहन्ता बृहतीभिरूती इन्द्र यातं वरुण वाजसातौ।
        यद्दिद्यवः पृतनासु प्रक्रीळान्तस्य वां स्याम सनितार आजेः॥ ४.०४१.११


ऋग्वेदः वैदिकस्वरविरहितः मण्डलं ४. Rigveda, Mandala - 4, Sukta - 42.

        मम द्विता राष्ट्रं क्षत्रियस्य विश्वायोर्विश्वे अमृता यथा नः।
        क्रतुं सचन्ते वरुणस्य देवा राजामि कृष्टेरुपमस्य वव्रेः॥ ४.०४२.०१

        अहं राजा वरुणो मह्यं तान्यसुर्याणि प्रथमा धारयन्त।
        क्रतुं सचन्ते वरुणस्य देवा राजामि कृष्टेरुपमस्य वव्रेः॥ ४.०४२.०२

        अहमिन्द्रो वरुणस्ते महित्वोर्वी गभीरे रजसी सुमेके।
        त्वष्टेव विश्वा भुवनानि विद्वान्समैरयं रोदसी धारयं च॥ ४.०४२.०३

        अहमपो अपिन्वमुक्षमाणा धारयं दिवं सदन ऋतस्य।
        ऋतेन पुत्रो अदितेरृतावोत त्रिधातु प्रथयद्वि भूम॥ ४.०४२.०४

        मां नरः स्वश्वा वाजयन्तो मां वृताः समरणे हवन्ते।
        कृणोम्याजिं मघवाहमिन्द्र इयर्मि रेणुमभिभूत्योजाः॥ ४.०४२.०५

        अहं ता विश्वा चकरं नकिर्मा दैव्यं सहो वरते अप्रतीतम्।
        यन्मा सोमासो ममदन्यदुक्थोभे भयेते रजसी अपारे॥ ४.०४२.०६

        विदुष्टे विश्वा भुवनानि तस्य ता प्र ब्रवीषि वरुणाय वेधः।
        त्वं वृत्राणि शृण्विषे जघन्वान्त्वं वृताँ अरिणा इन्द्र सिन्धून्॥ ४.०४२.०७

        अस्माकमत्र पितरस्त आसन्सप्त ऋषयो दौर्गहे बध्यमाने।
        त आयजन्त त्रसदस्युमस्या इन्द्रं न वृत्रतुरमर्धदेवम्॥ ४.०४२.०८

        पुरुकुत्सानी हि वामदाशद्धव्येभिरिन्द्रावरुणा नमोभिः।
        अथा राजानं त्रसदस्युमस्या वृत्रहणं ददथुरर्धदेवम्॥ ४.०४२.०९

        राया वयं ससवांसो मदेम हव्येन देवा यवसेन गावः।
        तां धेनुमिन्द्रावरुणा युवं नो विश्वाहा धत्तमनपस्फुरन्तीम्॥ ४.०४२.१०


ऋग्वेदः वैदिकस्वरविरहितः मण्डलं ४. Rigveda, Mandala - 4, Sukta - 43.

        क उ श्रवत्कतमो यज्ञियानां वन्दारु देवः कतमो जुषाते।
        कस्येमां देवीममृतेषु प्रेष्ठां हृदि श्रेषाम सुष्टुतिं सुहव्याम्॥ ४.०४३.०१

        को मृळाति कतम आगमिष्ठो देवानामु कतमः शम्भविष्ठः।
        रथं कमाहुर्द्रवदश्वमाशुं यं सूर्यस्य दुहितावृणीत॥ ४.०४३.०२

        मक्षू हि ष्मा गच्छथ ईवतो द्यूनिन्द्रो न शक्तिं परितक्म्यायाम्।
        दिव आजाता दिव्या सुपर्णा कया शचीनां भवथः शचिष्ठा॥ ४.०४३.०३

        का वां भूदुपमातिः कया न आश्विना गमथो हूयमाना।
        को वां महश्चित्त्यजसो अभीक उरुष्यतं माध्वी दस्रा न ऊती॥ ४.०४३.०४

        उरु वां रथः परि नक्षति द्यामा यत्समुद्रादभि वर्तते वाम्।
        मध्वा माध्वी मधु वां प्रुषायन्यत्सीं वां पृक्षो भुरजन्त पक्वाः॥ ४.०४३.०५

        सिन्धुर्ह वां रसया सिञ्चदश्वान्घृणा वयोऽरुषासः परि ग्मन्।
        तदू षु वामजिरं चेति यानं येन पती भवथः सूर्यायाः॥ ४.०४३.०६

        इहेह यद्वां समना पपृक्षे सेयमस्मे सुमतिर्वाजरत्ना।
        उरुष्यतं जरितारं युवं ह श्रितः कामो नासत्या युवद्रिक्॥ ४.०४३.०७


ऋग्वेदः वैदिकस्वरविरहितः मण्डलं ४. Rigveda, Mandala - 4, Sukta - 44.

        तं वां रथं वयमद्या हुवेम पृथुज्रयमश्विना संगतिं गोः।
        यः सूर्यां वहति वन्धुरायुर्गिर्वाहसं पुरुतमं वसूयुम्॥ ४.०४४.०१

        युवं श्रियमश्विना देवता तां दिवो नपाता वनथः शचीभिः।
        युवोर्वपुरभि पृक्षः सचन्ते वहन्ति यत्ककुहासो रथे वाम्॥ ४.०४४.०२

        को वामद्या करते रातहव्य ऊतये वा सुतपेयाय वार्कैः।
        ऋतस्य वा वनुषे पूर्व्याय नमो येमानो अश्विना ववर्तत्॥ ४.०४४.०३

        हिरण्ययेन पुरुभू रथेनेमं यज्ञं नासत्योप यातम्।
        पिबाथ इन्मधुनः सोम्यस्य दधथो रत्नं विधते जनाय॥ ४.०४४.०४

        आ नो यातं दिवो अच्छा पृथिव्या हिरण्ययेन सुवृता रथेन।
        मा वामन्ये नि यमन्देवयन्तः सं यद्ददे नाभिः पूर्व्या वाम्॥ ४.०४४.०५

        नू नो रयिं पुरुवीरं बृहन्तं दस्रा मिमाथामुभयेष्वस्मे।
        नरो यद्वामश्विना स्तोममावन्सधस्तुतिमाजमीळ्हासो अग्मन्॥ ४.०४४.०६

        इहेह यद्वां समना पपृक्षे सेयमस्मे सुमतिर्वाजरत्ना।
        उरुष्यतं जरितारं युवं ह श्रितः कामो नासत्या युवद्रिक्॥ ४.०४४.०७


ऋग्वेदः वैदिकस्वरविरहितः मण्डलं ४. Rigveda, Mandala - 4, Sukta - 45.

        एष स्य भानुरुदियर्ति युज्यते रथः परिज्मा दिवो अस्य सानवि।
        पृक्षासो अस्मिन्मिथुना अधि त्रयो दृतिस्तुरीयो मधुनो वि रप्शते॥ ४.०४५.०१

        उद्वां पृक्षासो मधुमन्त ईरते रथा अश्वास उषसो व्युष्टिषु।
        अपोर्णुवन्तस्तम आ परीवृतं स्वर्ण शुक्रं तन्वन्त आ रजः॥ ४.०४५.०२

        मध्वः पिबतं मधुपेभिरासभिरुत प्रियं मधुने युञ्जाथां रथम्।
        आ वर्तनिं मधुना जिन्वथस्पथो दृतिं वहेथे मधुमन्तमश्विना॥ ४.०४५.०३

        हंसासो ये वां मधुमन्तो अस्रिधो हिरण्यपर्णा उहुव उषर्बुधः।
        उदप्रुतो मन्दिनो मन्दिनिस्पृशो मध्वो न मक्षः सवनानि गच्छथः॥ ४.०४५.०४

        स्वध्वरासो मधुमन्तो अग्नय उस्रा जरन्ते प्रति वस्तोरश्विना।
        यन्निक्तहस्तस्तरणिर्विचक्षणः सोमं सुषाव मधुमन्तमद्रिभिः॥ ४.०४५.०५

        आकेनिपासो अहभिर्दविध्वतः स्वर्ण शुक्रं तन्वन्त आ रजः।
        सूरश्चिदश्वान्युयुजान ईयते विश्वाँ अनु स्वधया चेतथस्पथः॥ ४.०४५.०६

        प्र वामवोचमश्विना धियंधा रथः स्वश्वो अजरो यो अस्ति।
        येन सद्यः परि रजांसि याथो हविष्मन्तं तरणिं भोजमच्छ॥ ४.०४५.०७

ऋग्वेदः वैदिकस्वरविरहितः मण्डलं ४. Rigveda, Mandala - 4, Sukta - 45.