Rig Veda, Mandala - 09, Sukta - 51 to 55. Astro Classes.

Rig Veda, Mandala - 09, Sukta - 51.

अध्वर्यो अद्रिभिः सुतं सोमं पवित्र आ सृज।

पुनीहीन्द्राय पातवे॥ ९.०५१.०१

दिवः पीयूषमुत्तमं सोममिन्द्राय वज्रिणे।

सुनोता मधुमत्तमम्॥ ९.०५१.०२

तव त्य इन्दो अन्धसो देवा मधोर्व्यश्नते।

पवमानस्य मरुतः॥ ९.०५१.०३

त्वं हि सोम वर्धयन्सुतो मदाय भूर्णये।

वृषन्स्तोतारमूतये॥ ९.०५१.०४

अभ्यर्ष विचक्षण पवित्रं धारया सुतः।

अभि वाजमुत श्रवः॥ ९.०५१.०५

Rig Veda, Mandala - 09, Sukta - 52.

परि द्युक्षः सनद्रयिर्भरद्वाजं नो अन्धसा।

सुवानो अर्ष पवित्र आ॥ ९.०५२.०१

तव प्रत्नेभिरध्वभिरव्यो वारे परि प्रियः।

सहस्रधारो यात्तना॥ ९.०५२.०२

चरुर्न यस्तमीङ्खयेन्दो न दानमीङ्खय।

वधैर्वधस्नवीङ्खय॥ ९.०५२.०३

नि शुष्ममिन्दवेषां पुरुहूत जनानाम्।

यो अस्माँ आदिदेशति॥ ९.०५२.०४

शतं न इन्द ऊतिभिः सहस्रं वा शुचीनाम्।

पवस्व मंहयद्रयिः॥ ९.०५२.०५

Rig Veda, Mandala - 09, Sukta - 53.

उत्ते शुष्मासो अस्थू रक्षो भिन्दन्तो अद्रिवः।

नुदस्व याः परिस्पृधः॥ ९.०५३.०१

अया निजघ्निरोजसा रथसंगे धने हिते।

स्तवा अबिभ्युषा हृदा॥ ९.०५३.०२

अस्य व्रतानि नाधृषे पवमानस्य दूढ्या।

रुज यस्त्वा पृतन्यति॥ ९.०५३.०३

तं हिन्वन्ति मदच्युतं हरिं नदीषु वाजिनम्।

इन्दुमिन्द्राय मत्सरम्॥ ९.०५३.०४

Rig Veda, Mandala - 09, Sukta - 54.

अस्य प्रत्नामनु द्युतं शुक्रं दुदुह्रे अह्रयः।

पयः सहस्रसामृषिम्॥ ९.०५४.०१

अयं सूर्य इवोपदृगयं सरांसि धावति।

सप्त प्रवत आ दिवम्॥ ९.०५४.०२

अयं विश्वानि तिष्ठति पुनानो भुवनोपरि।

सोमो देवो न सूर्यः॥ ९.०५४.०३

परि णो देववीतये वाजाँ अर्षसि गोमतः।

पुनान इन्दविन्द्रयुः॥ ९.०५४.०४

Rig Veda, Mandala - 09, Sukta - 55.

यवंयवं नो अन्धसा पुष्टम्पुष्टं परि स्रव।

सोम विश्वा च सौभगा॥ ९.०५५.०१

इन्दो यथा तव स्तवो यथा ते जातमन्धसः।

नि बर्हिषि प्रिये सदः॥ ९.०५५.०२

उत नो गोविदश्ववित्पवस्व सोमान्धसा।

मक्षूतमेभिरहभिः॥ ९.०५५.०३

यो जिनाति न जीयते हन्ति शत्रुमभीत्य।

स पवस्व सहस्रजित्॥ ९.०५५.०४