Rig Veda, Mandala - 09, Sukta - 36 to 40. Astro Classes.

Rig Veda, Mandala - 09, Sukta - 36.

असर्जि रथ्यो यथा पवित्रे चम्वोः सुतः।

कार्ष्मन्वाजी न्यक्रमीत्॥ ९.०३६.०१

स वह्निः सोम जागृविः पवस्व देववीरति।

अभि कोशं मधुश्चुतम्॥ ९.०३६.०२

स नो ज्योतींषि पूर्व्य पवमान वि रोचय।

क्रत्वे दक्षाय नो हिनु॥ ९.०३६.०३

शुम्भमान ऋतायुभिर्मृज्यमानो गभस्त्योः।

पवते वारे अव्यये॥ ९.०३६.०४

स विश्वा दाशुषे वसु सोमो दिव्यानि पार्थिवा।

पवतामान्तरिक्ष्या॥ ९.०३६.०५

आ दिवस्पृष्ठमश्वयुर्गव्ययुः सोम रोहसि।

वीरयुः शवसस्पते॥ ९.०३६.०६

Rig Veda, Mandala - 09, Sukta - 37.

स सुतः पीतये वृषा सोमः पवित्रे अर्षति।

विघ्नन्रक्षांसि देवयुः॥ ९.०३७.०१

स पवित्रे विचक्षणो हरिरर्षति धर्णसिः।

अभि योनिं कनिक्रदत्॥ ९.०३७.०२

स वाजी रोचना दिवः पवमानो वि धावति।

रक्षोहा वारमव्ययम्॥ ९.०३७.०३

स त्रितस्याधि सानवि पवमानो अरोचयत्।

जामिभिः सूर्यं सह॥ ९.०३७.०४

स वृत्रहा वृषा सुतो वरिवोविददाभ्यः।

सोमो वाजमिवासरत्॥ ९.०३७.०५

स देवः कविनेषितोऽभि द्रोणानि धावति।

इन्दुरिन्द्राय मंहना॥ ९.०३७.०६
Rig Veda, Mandala - 09, Sukta - 38.

एष उ स्य वृषा रथोऽव्यो वारेभिरर्षति।

गच्छन्वाजं सहस्रिणम्॥ ९.०३८.०१

एतं त्रितस्य योषणो हरिं हिन्वन्त्यद्रिभिः।

इन्दुमिन्द्राय पीतये॥ ९.०३८.०२

एतं त्यं हरितो दश मर्मृज्यन्ते अपस्युवः।

याभिर्मदाय शुम्भते॥ ९.०३८.०३

एष स्य मानुषीष्वा श्येनो न विक्षु सीदति।

गच्छञ्जारो न योषितम्॥ ९.०३८.०४

एष स्य मद्यो रसोऽव चष्टे दिवः शिशुः।

य इन्दुर्वारमाविशत्॥ ९.०३८.०५

एष स्य पीतये सुतो हरिरर्षति धर्णसिः।

क्रन्दन्योनिमभि प्रियम्॥ ९.०३८.०६

Rig Veda, Mandala - 09, Sukta - 39.

आशुरर्ष बृहन्मते परि प्रियेण धाम्ना।

यत्र देवा इति ब्रवन्॥ ९.०३९.०१

परिष्कृण्वन्ननिष्कृतं जनाय यातयन्निषः।

वृष्टिं दिवः परि स्रव॥ ९.०३९.०२

सुत एति पवित्र आ त्विषिं दधान ओजसा।

विचक्षाणो विरोचयन्॥ ९.०३९.०३

अयं स यो दिवस्परि रघुयामा पवित्र आ।

सिन्धोरूर्मा व्यक्षरत्॥ ९.०३९.०४

आविवासन्परावतो अथो अर्वावतः सुतः।

इन्द्राय सिच्यते मधु॥ ९.०३९.०५

समीचीना अनूषत हरिं हिन्वन्त्यद्रिभिः।

योनावृतस्य सीदत॥ ९.०३९.०६

Rig Veda, Mandala - 09, Sukta - 40.

पुनानो अक्रमीदभि विश्वा मृधो विचर्षणिः।

शुम्भन्ति विप्रं धीतिभिः॥ ९.०४०.०१

आ योनिमरुणो रुहद्गमदिन्द्रं वृषा सुतः।

ध्रुवे सदसि सीदति॥ ९.०४०.०२

नू नो रयिं महामिन्दोऽस्मभ्यं सोम विश्वतः।

आ पवस्व सहस्रिणम्॥ ९.०४०.०३

विश्वा सोम पवमान द्युम्नानीन्दवा भर।

विदाः सहस्रिणीरिषः॥ ९.०४०.०४

स नः पुनान आ भर रयिं स्तोत्रे सुवीर्यम्।

जरितुर्वर्धया गिरः॥ ९.०४०.०५

पुनान इन्दवा भर सोम द्विबर्हसं रयिम्।

वृषन्निन्दो न उक्थ्यम्॥ ९.०४०.०६